Dzień Śląski

 Dzisioj cołki post bydzie po naszymu, a to skuli tego, że dzisioj momy we naszyj szkole DZIEŃ ŚLĄSKI. Narychtowali my dlo Wos roztomajte graczki a gyszynki.

Nojsomprzód ciście na YouTube szkoły. Tam mocie richtich gryfny film, we kerym Pani Alina ze MDK BATORY pokoże Wom, jak mocie zrobić czako dlo górnika abo galanda (wionek z kwiotków a szlajfek) do frelki.

Kliknij zdjęcie aby przejść do filmu

Kej żeście sie już pobajstlowali, to terozki sie pogodomy. Po naszymu. Łobejrzcie sie jak nasze szkolnioki godajom na lekcjach online!

Kliknij zdjęcie aby przejść do filmu

To terozki sie pośpiywomy! Trzi gryfne dziołszki, kere poradzom bardzo dobrze śpiywać, nagrywają covery światowych śpiywek po śląsku! Kej niy znocie jeszcze zespołu FRELE, to poznejcie i posłuchejcie. Śpiywać tyż możecie!

Kliknij zdjęcie aby przejść do filmu

A Wy poradzicie po naszymu? Wiycie co to karminadel, amajza abo gynsi pympek? To tukej mocie test, na kerym możecie sie sprawdzić!

Kliknij na zadanie aby przejść do całego quizu

Ale Śląsk to niy ino godanie, wice a kupa śmiychu. To tysz cołkiem poważne sprawy, jak powstania śląskie abo ciynżko robota. Kej Wasza Oma abo Opa durś som z Wami, pogodejcie sie łod czasu do czasu z nimi ło takich poważnych tematach. Bo kery jak niy łone majom ło tym pamiyntać nojlepi? A niy było lekko.

Na som koniec momy do Wos wierszyk kery na zicher znocie "Pan Hilary", ino tyż po naszymu. Poradzicie to przeczytać? Dejcie znać jak Wom poszło!

"Pan Hilary"

Loto, tyro pan Hilary. Na dekel mu piere
Bo kajś ten boroczek podzioł swoje brele.
Szuko we galotach, szaket obmacuje,
Obalo szczewiki, a psińco znajduje.
Bajzel w szranku i w byfyju
Tera leci do antryju.
"kurde" - ryczy -"kurde bele!
 Ftoś mi ukrod moje brele!"
 Wywraco leżanka i pod niom filuje,
Borok fest sie wnerwio, gnatów już nie czuje.
Szturcho we kachloku, kopie we kredynsie,
Glaca mo spocono, a cały sie czynsie.
Pierońskie brele na amyn kajś wcisnyło
Za oknym już downo blank sie sciymniło
Do rzadła łoroz zaglondo Hilary
Aż mu po puklu przefurgły ciary.
Spoziyro na kichol, po łebie sie klupnoł,
Bo znodły sie brele - te, co tak ich szukoł!
Czy to niy ma gańba? No powiydzcie sami,
Mieć brele na nosie a szukać pod ryczkami?